مرحبا …. 
كما تعودنا بالقطاعات الخاصة كل واحد بيغني على ليلاه وطبعا بس عنا لأنو بالدول المتقدمة دائما الشركات الخاصة ملزمة بالتقيد بأوامر الحكومة من جهة وبإرضاء زبائنها من جهة تانية .
من نهاية مونديال كأس العالم 2006 لحد هاد الوقت 2010 طلعت من راسنا إعلانات الـ MTN بخصوص إنها الراعي الرسمي لمونديال كأس العالم 2010 جنوب افريقيا .
وكيف ما راح الواحد بيطلعلوا MTN الراعي الرسمي والراعي الرسمي ولك حتى عالفاتورة طاجينها بوجه هالعالم .
يعني بتكون طالع من شي مركز ام تي ان ودافع فاتورة وحاسس حالك مغبون ( متخورف) بخدمات سيئة وأسعار عالية ... وبتشوف شعار المونديال عالفاتورة بتواسي حالك بتقول يلله بكرى عالمونديال منستفيد من هالرعاية شوي ….. ومن فترة قصيرة صرعونا على الراديوهات المحليه ( خلي المونديال علينا ) أنا صرت قول لحالي يالله رح يوزعوا كروت الجزيرة الرياضية بالقرعة لشي 1000 مشترك أو يطلعوا شي 20 واحد ببلاش ع جنوب افريقيا (طبعا بدون إجراء مسابقات ) أو رح يوزعوا شاشات LCD ومعHD كمان يعني هيك شي الو علاقة بالرياضة وبحدث المونديال اللي قلب الدنيا من شرقها لغربها .
وطلعت المفاجئة العظيمة والمنتظره والمبلوفين فيها من اربع سنين (انو ارسل رسالة مدري على انو رقم واشترك بخدمة نتائج مباريات المونديال لتصلك مباشرة مقابل رسم اشتراك 100 ليرة – وبكل وقاحة بيقولولك بنهاية الإعلان “ما قلنالك خلي المونديال علينا ” ) شيء مقرف من هذا القبيل
عأساس المهتم بالرياضة رح ينتظر اس ام اس تخبروا شو النتيجة – إصلا اذا رسالة الاس ام اس بيرسلها الواحد بأوقات معينة بستغرق أكتر من ساعة لتصل للطرف الاخر
وشو بدو يحكي الواحد لسه عن خدمات الانترنت السيئة و وأنصاف وأرباع الخدمات …
حتى أنو موقع : MTN foorball لا يدعم اللغة العربية !!!
والسؤال اللي بيطرح نفسو هون : مشتركي MTN في البلدان التانية بيعانوا من هالمشاكل كمان .؟؟!!!! وليش هالإستغباء والاستغلال الفظيع للمستخدمين ؟؟!!!
وبما أنو هيك صارت الرعاية استعدوا جميعا ( مدونة علوش الراعي الرسمي ,والحصري لمونديال كأس العالم 2014 )
ملاحظة غير مهمة : – كنت المفروض حط صورة كريكاتيرية بالتدوينة بس ما لقيت وعلى وجه السرعة اكتفيت بصورة لوغو المونديال
وصلة قصيرة للتدوينة : http://wp.me/pkPoB-2V
مشيها بتمشي صعبها بتصعب قال الي ما بيحضر ولادة عنزتو بتجبلو تور
تحياتي علوش
العلة ما هي في MTN نفسـها ، كتـير من البلدان الثانيـة اللي MTN لها فروع فيـها عاملـة عروض كبـيرة وجوائـز و سفريات للجمهور ، أضعف الإيمان في اليمن على سبـيل المثال MTN نصبت شاشات كبـيرة في ساحات البلد لتخلي الناس تشوف المونديال مجانــاً .
لما ما بـيكون في منافسـة ما رح تشوف الشركة نفسها بحاجة لتقدم لك عروض كمستهلك ، خلص يعني إنت مجبور يا تتعامـل معها يا مع سرقة تيـل ، والاتـنيـن أضرب من بعض والاتنـين مزبطـين كل شي مع بعض ، بقى بس يسمـح السيـد رامي لشي مشغـل تالت عليه القيمة يدخـل عالبلـد من دون ما يشاركه في الأرباح .. ساعتها ممكن الشركة تحس على دمتها وتلحق الزبون بدل ما الزبون لاحقـها ، وهالشي طبعاً ممكن يصيـر على زمن ولادك ، الله يمدك بالعمـر الطويـل .
تحياتي
[...] This post was mentioned on Twitter by المدوّن, علوش. علوش said: خيبة أمل لمشتركي MTN بخصوص الرعاية الرسمية لمونديال كأس العالم جنوب افريقيا 2010: http://wp.me/pkPoB-2V http://wp.me/pkPoB-2V [...]
لا علوش مو هي المفاجئة
لما قالت ام تي ان خليها علينا … فعلا خليناها عليها .. بس وين المفاجئة
القصة انو رح يركبو شاشات عملاقة ببعض المحافظات لتشوف العالم كاس العالم مجانا
بحلب رح يحطو 3 شاشات :بساحة سعد الله الجابري و عند القلعة وعند شهبا مول
رح من المتوقع امة محمد كلها تكون هنيك والاجواء بتهوي وتعيسة جدا ، لهيك يفضل انك تاخد معك خوذة و درع واقي ازا حابب تحضرو على حساب ام تي ان
اليوم منزلين كمان عرض لبطاقات جديدة مسبق الدفع بيجي معها 100 وحدة مجانا صلاحية 6 شهور و طابة صفرا شغل ام تي ان